വാഹനാപകടത്തിൽ പരിക്കേറ്റ ഇന്ത്യൻ പൗരന് 60,000 ദിർഹം നഷ്ടപരിഹാരം അനുവദിച്ച് കോടതി

ഷാർജ: ഷാർജയിലെ ശൈഖ് ഖലീഫ ബിൻ സായിദ് സ്ട്രീറ്റിലുണ്ടായ വാഹനാപകടത്തിൽ പരിക്കേറ്റ മുഹമ്മദ് തൗസീഫ് ഗയാസ് അഹമ്മദിന് 60,000 ദിർഹം (ഏകദേശം 14.28 ലക്ഷം ഇന്ത്യൻ രൂപ) നഷ്ടപരിഹാരം നൽകാൻ കോടതി ഉത്തരവിട്ടു.

YAB ലീഗൽ സർവീസസ് സി.ഇ.ഒ സലാം പാപ്പിനിശ്ശേരിയുടെ നിയമപരമായ ഇടപെടലുകളാണ് ഈ അനുകൂല വിധിക്ക് കാരണമായത്. കൂടാതെ, മുഹമ്മദ് തൗസീഫിന്റെ ചികിത്സാ ചിലവുകൾക്കായി 3850 ദിർഹവും ഇൻഷുറൻസ് കമ്പനി നൽകണമെന്നും കോടതി വിധിച്ചു.

സംഭവം: 2024 ഏപ്രിൽ 27 ശനിയാഴ്ചയായിരുന്നു അപകടം. ഫുജൈറയിൽ നിന്ന് മലീഹയിലേക്ക് പോവുകയായിരുന്ന സിറിയൻ സ്വദേശി ഓടിച്ച നിസ്സാൻ പിക്കപ്പ് വാഹനം, റോഡരികിൽ പച്ചക്കറി വിൽക്കാൻ നിർത്തിയിട്ടിരുന്ന ഒരു ടൊയോട്ട കാമറിയിൽ ഇടിക്കുകയായിരുന്നു. ഈ നിസ്സാൻ പിക്കപ്പ് വാഹനത്തിലെ യാത്രക്കാരനായിരുന്നു മുഹമ്മദ് തൗസീഫ് ഗയാസ് അഹമ്മദ്. ഡ്രൈവറുടെ അശ്രദ്ധയും ട്രാഫിക് നിയമങ്ങൾ ലംഘിച്ചതുമാണ് അപകടത്തിലേക്ക് നയിച്ചത്. കൂട്ടിയിടിയുടെ ആഘാതത്തിൽ രണ്ട് വാഹനങ്ങളും റോഡിന് പുറത്തേക്ക് മറിയുകയും മുഹമ്മദ് തൗസീഫിന് കാലിൽ ഗുരുതരമായി പരിക്കേൽക്കുകയും ചെയ്തു.

കോടതി നടപടികൾ: ദുബായ് ക്രിമിനൽ കോടതിയിൽ നടന്ന ക്രിമിനൽ കേസിൽ, അപകടത്തിന് കാരണക്കാരനായ സിറിയൻ ഡ്രൈവർക്ക് 1000 ദിർഹം പിഴ ചുമത്തിയിരുന്നു. തുടർന്ന്, YAB ലീഗൽ സർവീസസ് സി.ഇ.ഒ സലാം പാപ്പിനിശ്ശേരി മുഖേന മുഹമ്മദ് തൗസീഫ് ഗയാസ് അഹമ്മദ് നഷ്ടപരിഹാര കേസ് ഫയൽ ചെയ്യുകയായിരുന്നു. അപകടത്തിന് കാരണമായ വാഹനത്തിന്റെ ഇൻഷുറൻസ് കമ്പനിയെയാണ് എതിർകക്ഷിയാക്കി കേസ് നൽകിയത്.

പോലീസ് ചോദ്യം ചെയ്യലിൽ, താൻ വലത് പാതയിലൂടെ മണിക്കൂറിൽ 90 കിലോമീറ്റർ വേഗതയിൽ വാഹനമോടിക്കുകയായിരുന്നു എന്നും, തനിക്കൊപ്പം ഒരു സുഹൃത്ത് യാത്ര ചെയ്യുന്നുണ്ടായിരുന്നു എന്നും ഡ്രൈവർ മൊഴി നൽകിയിരുന്നു. എന്താണ് സംഭവിച്ചതെന്ന് കൃത്യമായി അറിയില്ലെന്നും, ഒരുപക്ഷേ വലത് മുൻ ടയർ പൊട്ടിത്തെറിച്ചതായിരിക്കാമെന്നും, കൂട്ടിയിടി ഉണ്ടായപ്പോൾ ബോധരഹിതനായെന്നും, വാഹനത്തിന്റെ തകരാറാണ് അപകടത്തിന് കാരണമെന്നും, താൻ തെറ്റുകാരനല്ലെന്നും ഡ്രൈവർ വാദിച്ചിരുന്നു.

എന്നിരുന്നാലും, അപകട റിപ്പോർട്ടിന്റെ പകർപ്പ്, ഫോറൻസിക് മെഡിക്കൽ റിപ്പോർട്ട്, പേയ്‌മെന്റ് രസീതുകൾ എന്നിവ ഉൾപ്പെടെയുള്ള സമർപ്പിച്ച രേഖകളും മറ്റ് തെളിവുകളും പരിഗണിച്ച്, മുഹമ്മദ് തൗസീഫിന് ഇൻഷുറൻസ് കമ്പനി നഷ്ടപരിഹാരം നൽകണമെന്ന് കോടതി ഉത്തരവിടുകയായിരുന്നു.