റാസൽഖൈമ വാഹനാപകടം: മുഹമ്മദ് ആമിർ മുഹമ്മദ് ഹുസൈന് 90,000 ദിർഹം നഷ്ടപരിഹാരം

റാസൽഖൈമ: റാസൽഖൈമയിൽ നടന്ന വാഹനാപകടത്തിൽ പരിക്കേറ്റ പാകിസ്താൻ സ്വദേശി മുഹമ്മദ് ആമിർ മുഹമ്മദ് ഹുസൈന് 90,000 ദിർഹം (ഏകദേശം 70 ലക്ഷം പാകിസ്താൻ രൂപ) നഷ്ടപരിഹാരം ലഭിച്ചു. YAB ലീഗൽ സർവീസസ് സി.ഇ.ഒ. സലാം പാപ്പിനിശ്ശേരിയുടെ നിയമസഹായത്തിലൂടെയാണ് ഈ വിധി നേടിയത്.

2024 മാർച്ച് 21-നാണ് റാസൽഖൈമയിലെ അൽ റിഫ ഏരിയയിൽ വെച്ച് അപകടം നടന്നത്. ഒരു ചെറിയ പോക്കറ്റ് റോഡിൽ നിന്ന് പ്രധാന റോഡിലേക്ക് പ്രവേശിക്കുമ്പോൾ, പാകിസ്താൻ സ്വദേശി ഓടിച്ചിരുന്ന പിക്കപ്പ് വാൻ മുഹമ്മദ് ആമിർ ഓടിച്ചിരുന്ന മോട്ടോർ സൈക്കിളിൽ ഇടിക്കുകയായിരുന്നു. പിക്കപ്പ് വാൻ ഡ്രൈവറുടെ അശ്രദ്ധയും മതിയായ അകലം പാലിക്കാത്തതുമാണ് അപകടത്തിന് കാരണമെന്ന് കണ്ടെത്തി. ഈ കേസിൽ, പിക്കപ്പ് വാൻ ഡ്രൈവർക്ക് 2,000 ദിർഹം പിഴ ചുമത്തിയിരുന്നു.

അപകടത്തിൽ മുഹമ്മദ് ആമിറിന് കൈകൾക്കും ശരീരത്തിന്റെ മറ്റ് ഭാഗങ്ങളിലും ഗുരുതരമായ പരിക്കുകളുണ്ടായി. തുടർന്ന്, അദ്ദേഹം സലാം പാപ്പിനിശ്ശേരിയുടെ നേതൃത്വത്തിലുള്ള YAB ലീഗൽ സർവീസസിനെ സമീപിച്ചു. അപകട റിപ്പോർട്ട്, ക്രിമിനൽ കേസ് വിധി, ഫോറൻസിക് മെഡിക്കൽ റിപ്പോർട്ട്, പേയ്‌മെന്റ് രസീതുകൾ തുടങ്ങിയ ആവശ്യമായ രേഖകൾ അഭിഭാഷകർ കോടതിയിൽ സമർപ്പിച്ചു.

സമർപ്പിച്ച രേഖകളും വിവരങ്ങളും വിശദമായി പരിശോധിച്ച ശേഷം, ഇൻഷുറൻസ് അതോറിറ്റി മുഹമ്മദ് ആമിറിന് 90,000 ദിർഹം നഷ്ടപരിഹാരമായി നൽകാനും, മെഡിക്കൽ ചെലവുകൾക്കായി 3,850 ദിർഹം അധികമായി നൽകാനും ഉത്തരവിട്ടു.